ខ្សែប្រយុទ្ធ Robin van Persie របស់បីសាចក្រហម Manchester United បានបដិសេធន៍ចំពោះរបាយការណ៍ដែលថាលោកត្រូវការវះកាត់ព្យាបាលជង្គង់ ។
កាលពីដើមសប្ដាហ៍នេះ មានរបាយការណ៍ដែលលើកឡើងថា កីឡាករវ័យ ៣១ ឆ្នាំ Van Persie អាចនឹងអាក់ខានការប្រកួតជាច្រើនខែដោយសារតែការវះកាត់ជង្គង់ បន្ទាប់ពីពន្យារពេលព្យាបាលកាលពីមុនពេលប្រកួតបាល់ពិភពលោក World Cup ។
ស្របពេលដែលលោក Louis Van Gaal បានចុះកិច្ចសន្យាខ្ចីជើងជាមួយកីឡាករ Radamel Falcao ពីក្លឹប Monaco គឺត្រូវបានគេគិតថាអាចនឹងមកជំនួស Van Persie ដោយសារតែរបួសនេះឯង ប៉ុន្តែខ្សែប្រយុទ្ធជម្រើសជាតិហុល្លង់រូបនេះបានច្រានចោលនូវព័ត៌មានទាំងអស់នោះ ។
លោកបានប្រាប់ដល់ប៉ុស្ដិ៍ទូរទស្សន៍ FOX Sports ថា "ខ្ញុំមិនដឹងថា ពាក្យចរចាមរាមទាំងនោះមកពីណាទេ"។ "ខ្ញុំសូមប្រាប់តាមត្រង់ថា ខ្ញុំនឹងមិនទៅកាន់មន្ទីរពេទ្យដើម្បីធ្វើការវះកាត់តាមដែលគេនិយាយតៗគ្នានោះឡើយ ។
Van Persie បានជួបបញ្ហារបួសជាច្រើនលើកច្រើនសារកាលពីរដូវកាលមុន ប៉ុន្តែលោកនៅអាចបង្ហាញវត្តមាន ២១ ប្រកួតក្នុងក្របខ័ណ្ឌ Premier League នឹងអាចស៊ុតបញ្ចូលទីបាន ១២ គ្រាប់ ។
No comments:
Post a Comment